Foreldre til barn med autismespekterforstyrringar sine erfaringar kring samarbeid mellom skule og heim

Abstract

Bakgrunn: Barn med autismespekterforstyrring (ASF) har behov for eit heilskapleg tilpassa tilbod, og skule-heim samarbeidet er særleg viktig. Hensikta med studien var å undersøke korleis foreldre til barn med autismespekterforstyrringar erfarte involvering og samarbeid med skulen.

Metode: Studien har ei kvalitativ tilnærming, basert på intervju med sju foreldre til barn med ASF. Data er analysert ved hjelp av systematisk tekstkondensering.

Resultat: Foreldre vektlegg god dialog med skulen, og ønsker å medverke og involvere seg i barnet sin skulekvardag. Graden av medverknad og kommunikasjon med skulen varierer. Der skule-heim samarbeidet er basert på tett dialog, erfarer foreldra at skulen anerkjenner heimen som ein ressurs og opplever høg grad av medverknad. Andre foreldre opplever lav grad av foreldremedverknad. Dei kjenner seg til bry og opplever mykje konflikt med skulen.

Konklusjon: For foreldre kjenneteiknar eit godt samarbeid at dei får ei oppleving av å vere likeverdig part og har ein tett dialog med skulen, og det kan bidra til å redusere foreldrestress. Det er nødvendig at skulen tek ansvar for eit strukturert samarbeid mellom skule og heim, og anerkjenner foreldre som ein likeverdig part i samarbeidet. Tilrettelegging for god og nær dialog kan potensielt bidra til å skape eit betre skule-heim samarbeid i utfordrande samarbeid.